Anna Samwel, Author at WECF Georgia

ქალ ამომრჩეველთა მანიფესტი

ჩვენ, ქალები საქართველოს მოსახლეობის და შესაბამისად, ამომრჩეველთა ნახევარზე მეტს წარმოვადგენთ. თუმცა, ამის მიუხედავად, ჩვენი ხმა არ ისმის საკმარისად ხმამაღლა. ჩვენი პრობლემები და გამოწვევები კი, ხშირ შემთხვევაში შეუსწავლელი და უგულებელყოფილია სახელმწიფოს, ოპოზიციური პარტიებისა თუ საზოგადოების მხრიდან.

ჩვენ, ქალები, საუკუნეების განმავლობაში ვიბრძვით არჩევნებში მონაწილეობის, განათლების, ჯანდაცვის, დასაქმების თუ სხვა ფუნდამენტური უფლებებისთვის და ეს ბრძოლა დღესაც გრძელდება, რადგან მათი შენარჩუნების გარანტიები არაა მყარი.

დღეს, ჩვენ, ქალები, ვიბრძვით:

ეთნიკური/რელიგიური და სხვა უმცირესობის წარმომადგენელი ქალების თანაბარი მონაწილეობისთვის და იმ ბარიერების დასაძლევად, რომლებიც აფერხებენ ჩვენს სრულფასოვან მონაწილეობას ქვეყნის პოლიტიკურ, სოციალურ, კულტურულ და ეკონომიკურ ცხოვრებაში;
ჯანდაცვის სერვისების გაუმჯობესებისა და ხელმისაწვდომობისთვის, აუნაზღაურებელი შრომის აღიარებისა და განაწილებისთვის, ჯანსაღი გარემოსა და ღირსეული სოციალური დაცვის სისტემის შესაქმნელად;
“რუსული კანონის”, გენდერული კვოტის გაუქმების, “ლგბტ პროპაგანდის” და ყველა იმ ღირსების შემლახავი ცვლილების წინააღმდეგ, რომელიც სისტემურ ჩაგვრას, უთანასწორობასა და სხვადასხვა ჯგუფების მიმართ დისკრიმინაციას ახალისებს;
არადემოკრატიული მმართველობის ფორმების წინააღმდეგ.

ამ მანიფესტით, ჩვენ, ეთნიკური უმცირესობებით დასახლებულ რეგიონებში მცხოვრებ ქალებს, 2024 წლის 26 ოქტომბრის არჩევნებამდე 10 დღით ადრე გვსურს მოვითხოვოთ უსაფრთხოების, კეთილდღეობის, პოლიტიკური მონაწილეობის და ეკონომიკური სტაბილურობის ის გარანტიები, რომლებიც კონსტიტუციით გვაქვს გარანტირებული.

დღეს, ჩვენზე, ქალებზე, ყველა სივრცესა და მოცემულობაში ძალადობენ და ჩვენი ყოველდღიურობა არ არის უსაფრთხო, ამიტომ:

სახელმწიფომ უნდა უზრუნველყოს ქალებისა და გოგონების დაცვა ძალადობისგან, გენდერული ნიშნით ჩადენილი დანაშაულის პრევენცია, მათზე დროული რეაგირება, დამნაშავეთა დასჯა და მსხვერპლთა ფსიქო-სოციალური რეაბილიტაცია და მხარდაჭერა.

მნიშვნელოვანია ვიცოდეთ, რომ ჩვენ არ ვართ მარტო, და ჩვენს დასაცავად არსებობს პოლიცია, სასამართლო და სხვა სტრუქტურები და ყველა მოძალადე კანონის წინაშე პასუხს აგებს. გენდერული ნიშნით ძალადობის აღკვეთისა და პრევენციის მიზნით, მნიშვნელოვანია კანონით გათვალისწინებული ღონისძიებები მიმართული იყოს მოძალადის დამოკიდებულებებისა და ქცევის ცვლილებისკენ და მსხვერპლის საჭიროებებზე მორგებული მხარდაჭერის პროგრამების შეთავაზებებისკენ.

ქვეყანაში უნდა გაიზარდოს ძალადობის მსხვერპლთა დახმარების სერვისების ხელმისაწვდომობა და ხარისხი, მათ უნდა ჰქონდეთ წვდომა ფსიქოლოგიურ და სამართლებრივ დახმარებაზე.

ჩვენ, ქალები, ხშირად ვერ ვიღებთ გადაწყვეტილებებს ჩვენს სხეულთან დაკავშირებით ან ხშირად, არც კი გვაქვს ინფორმაცია ჩვენს სხეულსა და უფლებებზე, ამიტომ:

სექსუალური და რეპროდუქციული ჯანმრთელობის საკითხები სრულყოფილად უნდა იყოს წარმოდგენილი ეროვნულ სტრატეგიებსა და პროგრამებში, მათ შორის, ჯანდაცვის, განათლებისა და სოციალური დაცვის მიმართულებით.

სახელმწიფომ უნდა უზრუნველყოს სექსუალური და რეპროდუქციული ჯანმრთელობის სერვისებზე თანაბარი ხელმისაწვდომობა ყველა ქალისთვის, განსაკუთრებით, სოფლად მცხოვრები, დაბალი შემოსავლის მქონე, შშმ და ეთნიკური უმცირესობების წარმომადგენელი ქალებისთვის.

უზრუნველყოფილ უნდა იქნას სექსუალური და რეპროდუქციული ჯანმრთელობის შესახებ ინფორმაციისა და სერვისების მიწოდება ეთნიკური უმცირესობების ენებზე, მათ შორის აზერბაიჯანულ და სომხურ ენებზე.

სასიცოცხლოდ მნიშვნელოვანია, მოხდეს დაბალი შემოსავლის მქონე მოქალაქეების რეპროდუქციული ჯანმრთელობის პროგრამის დანერგვა. ეს პროგრამა უნდა მოიცავდეს: უფასო კონსულტაციებს რეპროდუქციული ჯანმრთელობის საკითხებზე, უფასო კონტრაცეფციის საშუალებებზე ხელმისაწვდომობას, ორსულობის პერიოდში უფასო სამედიცინო მეთვალყურეობას, უფასო მშობიარობას, პოსტნატალურ მოვლას, და სხვა.

უზრუნველყოფილ უნდა იქნას ქალთა უფლება, დამოუკიდებლად მიიღონ გადაწყვეტილებები საკუთარ სექსუალობასა და რეპროდუქციულ ჯანმრთელობასთან დაკავშირებით, იძულების, დისკრიმინაციისა და ძალადობის გარეშე.

დაინერგოს ყოვლისმომცველი სექსუალური განათლება ადრეული და ზოგადი განათლების სისტემის სასწავლო პროგრამებში, რათა ბავშვებმა მიიღონ სათანადო ცოდნა საკუთარი უფლებებისა და ჯანმრთელობის შესახებ, მათი ასაკისთვის შესაფერისი ცოდნის მიწოდებით.

ჩვენი, ქალების, მხრებზე გადაიარა ამ ქვეყანაში არაერთმა ომმა, არეულობამ და სიდუხჭირემ. თუმცა, ამის მიუხედავად, ჩვენი ინტერესების გათვალისწინება მშვიდობისა და უსაფრთხოების სფეროში, მხოლოდ სიმბოლურად თუ ხდება, ამიტომ:

ეროვნული უსაფრთხოების კონცეფცია, უნდა მოიცავდეს, ქალების, როგორც მშვიდობის და უსაფრთხოების სფეროში ძირითადი აქტორების ხმას;

უნდა გაიზარდოს ქალთა არაფორმალური ინიციატივებისა და სახალხო დიპლომატიის პროექტების აქტიური მხარდაჭერა;

გაიზარდოს ქალთა წარმომადგენლობა კონფლიქტების გადაჭრის საკითხებსა და სამშვიდობო მისიებში/მოლაპარაკებებში;

სახელმწიფომ უნდა გააგრძელოს 2020 წლის საარჩევნო რეფორმით დაწყებული პროცესი, რომელიც მიზნად ისახავდა საკანონმდებლო და ადგილობრივი თვითმმართველობის ორგანოებში ქალთა წარმომადგენლობის ზრდას, მათ შორის, კანონმდებლობაში უნდა დაბრუნდეს გენდერული კვოტირების მექანიზმი;

სახელმწიფო ხელისუფლებისა და ადგილობრივი თვითმმართველობის ორგანოებმა უნდა შეიმუშაონ გენდერული თანასწორობის პოლიტიკა, რაც ხელს შეუწყობს არა მხოლოდ არსებითი თანასწორობის მიღწევის პროცესს, არამედ, ეთნიკური უმცირესობების და ქალთა საჭიროებების გათვალისწინებას, მათ შორის ქალთა წარმომადგენლობის ზრდას;

ჩვენ, ქალები, ხშირად განვიცდით შრომით, კულტურულ-სოციალურ თუ სხვა სახის უთანასწორობას, რაც ჩვენს ყოველდღიურ ცხოვრებასა და განვითარების შესაძლებლობებზე აისახება, ამიტომ:

მნიშვნელოვანია შრომითი ურთიერთობის ყველა ეტაპზე დისკრიმინაციის აღმოფხვრა, მათ შორის, დისკრიმინაციის წინააღმდეგ საბრძოლველად ეფექტური მექანიზმების შეთავაზება, როგორც საჯარო დაწესებულებებში, ასევე კერძო უწყებებში დასაქმებული პირებისთვის;

უზრუნველყოფილი იყოს ქალებისა და კაცებისთვის თანაბარი წვდომა ხარისხიან განათლებაზე, მათ შორის სკოლამდელ, ზოგად, პროფესიულ და უმაღლეს განათლებაზე, ამ მიმართულებით, განსაკუთრებით ყურადღება უნდა დაეთმოს ეთნიკური უმცირესობების სპეციფიკურ საჭიროებებს;

უნდა გაუმჯობესდეს ჯანდაცვის სერვისებზე ფიზიკური და ფინანსური ხელმისაწვდომობა ყველა ქალისთვის, განსაკუთრებით კი მოწყვლადი ჯგუფებისთვის, როგორც ქალაქში, ისე - სოფლად.

ამ ყველაფრის მისაღწევად კი, მნიშვნელოვანია რაც შეიძლება მეტი ქალი მონაწილეობდეს გადაწყვეტილების მიღების პროცესებში, შესაბამისად, პოლიტიკურმა პარტიებმა უნდა:

შეიმუშაონ, განავითარონ და დანერგონ შიდაპარტიული გენდერული პოლიტიკა;

შექმნან მკაფიო პოლიტიკა სექსუალურ შევიწროებასთან მიმართებით;

გაწერონ ქალ კანდიდატთა მოზიდვისა და დაწინაურების მკაფიო წესები;

შეიმუშაონ და დანერგონ პარტიის წევრთა პროფესიული განვითარების სისტემა;

გაწერონ მკაფიო და ნათელი წესები რესურსების გადანაწილებისათვის, როგორც საარჩევნო, ისე არასაარჩევნო პერიოდში;

უზრუნველყონ ქალ წევრთა თანაბარი ხელმისაწვდომობა პარტიულ რესურსებზე.

უნდა გვახსოვდეს, რომ საერთო გამოწვევების მიუხედავად, ჩვენ, ქალები წარმოვადგენთ განსხვავებული გამოცდილებებისა და საჭიროებების მქონე ჯგუფების ერთობლიობას. ამიტომაც, სახელმწიფოს უნდა ჰქონდეს არა ერთი და ზოგადი მიდგომა, არამედ გენდერულად ტრანსფორმაციული, ინკლუზიური და ინტერსექციური პოლიტიკის წარმოების პასუხისმგებლობა.

ჩვენი, ქალების საჭიროებები განსხვავებულია, რადგან ჩვენ ვართ: ქალაქსა და სოფლად მცხოვრები ქალები, შშმ ქალები, ეთნიკური და რელიგიური უმცირესობების წარმომადგენელი ქალები, ქვიარ ქალები, ემიგრანტი ქალები, ოკუპირებულ ტერიტორიებსა და საზღვრისპირა სოფლებში მცხოვრები ქალები, რომლებიც ერთი საერთო მიზნისთვის ვიბრძვით - თანასწორი და ინკლუზიური გარემოს შესაქმნელად. ქალების შეუწყვეტელი ბრძოლა ფუნდამენტური უფლებების მოსაპოვებლად და მათ შესანარჩუნებლად გამყარებულია ფემინიზმის მონაპოვარით, რაც ნიშანი უნდა იყოს ყველასთვის, განსაკუთრებით, ძალაუფლებითა და პრივილეგიებით მოსარგებლე ჯფუგებისთვის, რომ ქალები სოციალური სამართლიანობისა და თანასწორობისთვის ბრძოლას არ შევწყვეტთ, რადგნ ჩვენი ბრძოლა გარდამტეხ ცვლილებებს უკავშირდება.

და რაც მთავარია, უნდა გვახსოვდეს, ჩვენი ხმა - ჩვენი ძალაა. ჩვენი ხმა კი, აუცილებლად გაისმება ყველგან, ქალაქისა თუ სოფლების მოედნებზე, ბაზრებში, ქუჩებში, სამუშაო ადგილებზე, საარჩევნო უბნებსა თუ საქართველოს პარლამენტში.

მასალა მომზადდა ორგანიზაცია „ქალები საერთო მომავლისთვის (WECF) - საქართველოსა“ მიერ, პროექტის „ინკლუზიური მომავალი: ქალების, ახალგაზრდების და უმცირესობების გაძლიერება ცვლილებისთვის“ ფარგლებში. პროექტი ხორციელდება USAID-ის „ერთიანობა მრავალფეროვნებაშია“ პროგრამის ფარგლებში, რომელსაც ახორციელებს საქართველოს გაეროს ასოციაცია, აშშ -ის საერთაშორისო განვითარების სააგენტოს ფინანსური მხარდაჭერით.

მასალაში მოცემული შეხედულებები და მოსაზრებები ეკუთვნის "ქალები საერთო მომავლისთვის (WECF) - საქართველოს” და არ უნდა აღიქმებოდეს აშშ-ის საერთაშორისო განვითარების სააგენტოს და საქართველოს გაეროს ასოციაციის ოფიციალურ პოზიციად.

by Anna Samwel

უმცირესობები წინასაარჩევნო კამპანიებში

წინამდებარე სტატიაში მოკლედ მიმოვიხილავ 2024 წლის საპარლამენტო არჩევნებში მონაწილე რეიტინგული პარტიებისა და ფრაქციების კამპანიებში სხვადასხვა ნიშნით ჩაგრული ჯგუფების მიმართ (არ)არსებულ პოლიტიკას. დასაწყისისთვის, მოკლედ აღვწერ წინასაარჩევნო კონტექსტს და შემდეგ განვიხილავ როგორ არიან ან არ არიან წარმოდგენილი უმცირესობები ოთხი საარჩევნო სუბიექტის წინასაარჩევნო პროგრამებსა და კამპანიებში. ესენია: 1. ქართული ოცნება + ქართული ძალა; 2. გახარია საქართველოსთვის, 3. ერთიანობა (ერთიანი ნაციონალური მოძრაობა, სტრატეგია აღმაშენებელი), 4. ძლიერი საქართველო (ლელო, მოქალაქეები, ხალხისთვის);

აღსანიშნავია, რომ თავდაპირველად ზემოხსენებულ სიაში ასევე უნდა ყოფილიყო „კოალიცია ცვლილებებისთვის” (გვარამია, მელია, გირჩი, დროა), თუმცა კოალიციას არ გააჩნია რაიმე პროგრამა ან საჯარო დოკუმენტი, რომლის მიხედვითაც მათი პოლიტიკის შეფასებას შევძლებდით.

უმცირესობებისა და ჩაგრული ჯგუფების მდგომარეობა ლაკმუსის ქაღალდია სახელმწიფოს ზოგადი პოლიტიკის გასაგებად და აღსაწერად. როგორც ევროინტეგრაციის საგარეო მიზნები, ისე ქვეყნის შიდა პოლიტიკა მოქალაქეებს იმთავითვე მძიმე სოციო-ეკონომიკურ სიტუაციაში აყენებს, სხვადასხვა ჯგუფების შემთხვევაში, ამას ემატება რასიზმი, ჰომოფობია, ტრანსფობია, ეიბლიზმი, სექსიზმი და სხვადასხვა სახის სტიგმა და ძალადობა. ამიტომ მათ მიმართ სპეციფიკური პოლიტიკის არსებობა სასიცოცხლოდ მნიშვნელოვანია ქვეყნის მოსახლეობის უმრავლესობისთვის, რომელიც საბოლოო ჯამში, ამა თუ იმ ნიშნით ჩაგრულად გვევლინება.

ფოტო: გურამ მურადოვი/civil.ge

კონტექსტი

არჩევნებს მძიმე და დაძაბული პოლიტიკური სიტუაცია უძღვის წინ. ამა წლის მარტის თვიდან ქართულმა ოცნებამ რამდენიმე ახალი საკანონმდებლო ცვლილება განახორციელა, მათ შორის ე.წ. “გამჭვირვალობის კანონი” და კანონი ე.წ. “ლგბტ პროპაგანდის” შესახებ, რომელიც რუსეთში მოქმედი კანონების მსგავსია და პარტიის პრო-რუსული და ანტიევროპული მიმართულების სიმბოლოდ იქცა. ოპოზიციური პარტიების და საზოგადოების მხრიდან პროტესტი მასიურ და ინდივიდუალურ ფიზიკურ თავდასხმებში ითარგმნა პრო-სახელისუფლებო ჯგუფების და პოლიციის მხრიდან.

მიუხედავად იმისა, რომ ამ კონტექსტში კიდევ უფრო გამოჩნდა ხელისუფლების ანტიდემოკრატიული და ავტორიტარული პოლიტიკის საფრთხეები, წინასაარჩევნო კამპანიები მაინც ქაოსური და ფრაგმენტული დარჩა. რთულია ვისაუბროთ გეგმებზე, კონკრეტულ დაპირებებსა და თანმიმდევრულ გზავნილებზე. პარტიების უმრავლესობას არც საარჩევნო პროგრამა აქვს და არც კონკრეტული გეგმა, რომელიც მათ პოლიტიკას გააცნობდა ამომრჩევლებს. ერთადერთ პოლიტიკურ პარტიებს, რომლებსაც პოლიტიკის დოკუმენტები გააჩნიათ, ძლიერი საქართველო, გახარია საქართველოსთვის და “სტრატეგია აღმაშენებელი” წარმოადგენენ, დანარჩენ პარტიების პოლიტიკაზე მხოლოდ სოციალურ მედიაში გავრცელებულ “ქარდებსა” და ვიდეო მასალაზე დაყრდნობით შეგვიძლია ვიმსჯელოთ. აქვე უნდა აღინიშნოს, რომ ეს ახალი პრობლემა არაა, საარჩევნო პროგრამების გამოქვეყნების მაგალითებს არც წინა არჩევნებზე ვხვდებით, საარჩევნო კამპანიების დროს ასევე იშვიათად გვხვდებოდა უმცირესობების საკითხები.

2024 წლის წინასაარჩევნო პერიოდში კი, პოლიტიკური კამპანიები მთლიანად გადაეწყო ქვეყნის საგარეო კურსის და ავტორიტარიზმთან ბრძოლის ირგვლივ. სწორედ ამ იდეების გარშემო რამდენიმე ოპოზიციური პარტია ფრაქციებად და კოალიციებად გაერთიანდა. თუმცა “ქართული ოცნების” ანტიგენდერული და პრორუსული ინიციატივების ფონზე დემოკრატიის სოციალურ და კულტურულ ასპექტებზე, უმცირესობების მიმართ პოლიტიკებზე საუბარი არათუ დაიწყო, უფრო მეტად შემცირდა. ასევე, უმცირესობის ცნებას ნაკლებად იყენებენ კამპანიებში, მას მხოლოდ ვაშაძის და გახარიას პროგრამებში ვხვდებით, თუმცა სხვადასხვა ნიშნით ჩაგრული ჯგუფები (მაგალითად, ქალები) და უმცირესობები (ეთნიკური, რელიგიური, შშმ ადამიანები და ა.შ.) ცალკე სახელობითად არიან მოხსენიებული ძლიერი საქართველოს პროგრამაში. თითოეული პოლიტიკური სუბიექტის მიხედვით უმცირესობების მიმართ პოლიტიკა შემდეგნაირად გამოიყურება:

“ქართული ოცნება - დემოკრატიული საქართველო”

ქართულ ოცნებას არ გააჩნია რაიმე ფორმის მანიფესტი ან პროგრამა რომელიც შეფასების საშუალებას მოგვცემდა. პარტიის წინასაარჩევნო კამპანიაზე დაკვირვებით შეგვიძლია ვთქვათ, რომ ის არ მოიცავს დაპირებებს ან უმცირესობათა რაიმე სახით მხარდაჭერას. პირიქით, მათი წინასაარჩევნო კამპანია მთლიანად არის აგებული ლგბტ თემის დისკრიმინაციასა და ჩაგვრაზე. სულ ახლახან საქართველოს პარლამენტში მიღებული კანონი ე.წ. “ლგბტ პროპაგანდის აკრძალვის შესახებ” პირდაპირ კრძალავს გენდერულ ტრანზიციას, უკრძალავს თვით-გამოხატვას ტრანსგენდერ ადამიანებს, აჩენს დისკრიმინაციის საფრთხეს სამუშაო ადგილებზე და აწესებს ცენზურას კულტურის ნაწარმოებებზე.

ქალებთან მიმართებაში, პარტიამ გააუქმა კონსტიტუციით უზრუნველყოფილი გენდერული კვოტები პარლამენტში და ანტი-ლგბტ კანონის განხილვისას, დააანონსა აბორტის და მარტოხელა დედების უფლებების შეზღუდვა.

“გახარია საქართველოსთვის”

პარტიის გაზეთის სახით გავრცელებულ პროგრამაში მოხსენიებული არიან: ბავშვები, პენსიონერები, სოციალურად დაუცველები, ემიგრანტები, ვეტერანები, შეზღუდული შესაძლებლობის მქონე პირები, ქალები, მაღალმთიან რეგიონებში და სოფლად მცხოვრები ადამიანები, უმუშევრები ნარკო- და თამაშდამოკიდებულები, დევნილები.

ძირითადი აქცენტები დასმულია ამ ჯგუფების სოციო-ეკონომიკურ გაძლიერებაზე, ფემიციდთან ბრძოლაზე, სოციალური სერვისების გაუმჯობესება-გაფართოებაზე, დასაქმებაზე, სოციალური დახმარების და პენსიის გაზრდაზე. აღსანიშნავია, რომ გახარია საქართველოსთვის ყველაზე უფრო სოციალურად მგრძნობიარე პროგრამას სთავაზობს ამომრჩეველს, თუმცა ჩაგვრის კულტურულ ასპექტებზე დუმს, ან უარესი, მხარს უჭერს კიდეც. მაგალითად, წინასაარჩევნო პერიოდში პარტიამ სურვილი გამოთქვა მხარი დაეჭირა ლგბტ პროპაგანდის შესახებ კანონის იმ ნაწილისთვის, რომელიც ბაღებსა და სკოლებში პროპაგანდის აკრძალვას მოიცავს, თუმცა მთლიან პაკეტს პარტიამ მხარი არ დაუჭირა.

“ერთიანობა” - ერთიანი ნაციონალური მოძრაობა, სტრატეგია აღმაშენებელი

კოალიციას არ აქვს გაცხადებული ერთიანი პროგრამა ან კამპანია, თუმცა შეგვიძლია ცალ-ცალკე შევაფასოთ ენმ-ს და სტრატეგია აღმაშენებელი-ს კამპანიები:

ერთიანი ნაციონალური მოძრაობა

ენმ-ს არ აქვს საარჩევნო პროგრამა, თუმცა მათი კამპანია კონკრეტული გზავნილებით და დაპირებებით გამოირჩევა. კამპანიაში გამოყოფილია შემდეგი ჯგუფები: ბავშვები, სტუდენტები, პენსიონერები. ამ ჯგუფებისთვის შემოთავაზებულია არა ზოგადი ხედვა, არამედ კონკრეტული პროექტები: უფასო კვება სკოლებში; მრავალშვილიანი ოჯახების დახმარება; პენსიონერების დახმარება, სტუდენტური საცხოვრებლის აშენება და სხვ. გარდა ამ დაპირებებისა, პარტიას უმცირესობების მიმართ რაიმე ერთიანი ან კონკრეტული პოლიტიკის ხედვა არ აქვს.

სტრატეგია აღმაშენებელი

სტრატეგია აღმაშენებელს დეტალური საარჩევნო პროგრამა აქვს, რომელიც ძირითადად მოიცავს პარტიის ხედვასა და გეგმებს ეკონომიკური განვითარების მიმართულებით. მიუხედავად იმისა, რომ “უმცირესობები” პროგრამაში ცალკე თავად არის გამოყოფილი, ის მხოლოდ ეთნიკური უმცირესობების მიმართულებით არის გაშლილი და მოიცავს ეთნიკური უმცირესობების ინტეგრაციის, ეკონომიკური თანასწორობის, განათლების, ქართული ენის სწავლების საკითხებს. ზოგადი სახით მოხსენიებულია გენდერულ მეინსტრიმინგიც და ეს მოიცავს ძალადობისგან დაცვას და საზოგადოებრივ ცხოვრებაში თანასწორ მონაწილეობას.

“ძლიერი საქართველო” - ლელო, მოქალაქეები, ხალხისთვის

კოალიციას “ძლიერი საქართველო” აქვს დეტალური პოლიტიკური პროგრამა უმცირესობების მიმართულებით. პროგრამის ვრცელ ვერსიაში მოხსენიებულია:

ახალგაზრდების დასაქმება და პენსიის ზრდა;
ოკუპირებულ ტერიტორიებზე და მოსაზღვრედ მცხოვრები მოსახლეობის სოციალური და ეკონომიკური გაძლიერება, “მეტის შეთავაზება ვიდრე რუსეთი სთავაზობთ”;
ეკონომიკური და პოლიტიკური თანასწორობა, პოლიტიკაში მეტი ქალის ჩართვა, სახელფასო სხვაობის აღმოფხვრა, გენდერული ძალადობისგან დაცვა;
დევნილების დასაქმება და საცხოვრისით უზრუნველყოფა;
ემიგრანტების დაბრუნება;
შშმ პირების დასაქმება და ჯანდაცვის გაუმჯობესება;
ნარკოპოლიტიკის მიმართულებით სადამსჯელო პოლიტიკის ზრუნვის მოდელით ჩანაცვლება;
ეთნიკური უმცირესობების პოლიტიკურ გაძლიერება, ენის სწავლება და კულტურული მემკვიდრეობის დაცვა.

აღსანიშნავია, რომ ეს პროგრამა არის ყველაზე კარგად დასაბუთებული და განვრცობილი უმცირესობების საკითხების თვალსაზრისით, ფარავს ჩაგრული ჯგუფების უდიდეს ნაწილს და ეყრდნობა რეალური პრობლემების და საჭიროებების ცოდნას. თუმცა, ეს დეტალები ნაკლებად გვხვდება კამპანიის მედიაში უფრო ხილვად ნაწილში, სადაც ძირითადად დასაქმებასა და პენსიის ზრდაზეა საუბარი.

დასკვნა

შეჯამების სახით შეგვიძლია ვთქვათ, რომ ქართული ოცნების რიტორიკა ყველაზე გაცხადებულად არის მიმართული უმცირესობების უფლებების შეზღუდვასა და ჩაგვრის კვლავწარმოებაზე, მაშინ, როცა დანარჩენი პარტიებისთვის ეს ჯგუფები ან უხილავია ან მხოლოდ ფორმალურად ჩნდება საარჩევნო კამპანიებში. დაპირებები და პოლიტიკა ყველაზე ხშირად მიემართება ასაკის მიხედვით ჩაგრულ ჯგუფებს - ბავშვებსა და მოხუცებს. ცხადია, ოპოზიციური პარტიები თავიანთ პოტენციურ ამომრჩევლად სწორედ მშობლებს და პენსიონერებს წამოიდგენენ, ფრაგმენტულად, წამოწეულია ახალგაზრდების და სტუდენტების სოციო-ეკონომიკური საკითხებიც. აღსანიშნავია ისიც, რომ “ანტი-ლგბტ კანონზე” ყველა ოპოზიციური პარტია დუმილს ამჯობინებს, რაც მათ პოპულისტურ ხედვაზე მიუთითებს: საზოგადოებაში ლგბტ თემის უფლებებზე საუბარი პოპულარული არ არის და მოსახლეობის დიდ ნაწილში მიმღებლობით არ გამოირჩევა, შესაბამისად, პარტიებს წინასაარჩევნოდ ამ საკითხთან ასოცირება, თუნდაც ძალადობასა და სიძულვილის პასუხად, არ აწყობთ. ასეთი დუმილი სახიფათოა არა მხოლოდ ლგბტ თემისთვის, არამედ მომავალში ნებისმიერი უმცირესობისთვის, რომელიც მმართველი პარტიის სამიზნე შეიძლება აღმოჩნდეს და რომლის საჭიროებებისკენ მიმართული პოლიტიკური ხედვა, როგორც ვხედავთ, არცერთ ოპოზიციურ პოლიტიკურ პარტიას არ გააჩნია.

ავტორი: ნუკრი ტაბიძე

პუბლიკაცია მომზადდა ორგანიზაცია „ქალები საერთო მომავლისთვის (WECF) - საქართველოსა“ და ავტორის მიერ, პროექტის „ინკლუზიური მომავალი: ქალების, ახალგაზრდების და უმცირესობების გაძლიერება ცვლილებისთვის“ ფარგლებში, USAID- ის პროგრამა „ერთიანობა მრავალფეროვნებაშია“ ფარგლებში, რომელსაც ახორციელებს საქართველოს გაეროს ასოციაცია, აშშ-ის საერთაშორისო განვითარების სააგენტოს ფინანსური მხარდაჭერით.

სტატიაში მოცემული შეხედულებები და მოსაზრებები ეკუთვნის "ქალები საერთო მომავლისთვის (WECF) - საქართველოს” და სტატიის ავტორს და არ უნდა აღიქმებოდეს აშშ-ის საერთაშორისო განვითარების სააგენტოს და საქართველოს გაეროს ასოციაციის ოფიციალურ პოზიციად.

by Anna Samwel

კვლევის პრეზენტაცია და ეკოფემინისტური სამუშაო ჯგუფის წარდგენა

*FOR ENGLISH SCROLL DOWN*

დრო: 2 ოქტომბერი, 14:30 ადგილი: Redisson Blu Iveria

“ქალები საერთო მომავლისთვის (WECF) - საქართველო” გიწვევთ კვლევის “კლიმატის ცვლილებით გამოწვეული კატასტროფები და ქალები: ეკომიგრაციის პრევენციისა და მართვის სისტემური პრობლემები” პრეზენტაციასა და პირველი ეკოფემინისტური სამუშაო ჯგუფის ოფიციალურ წარდგენაზე.

კვლევის შესახებ ისაუბრებს მკვლევარი - მარიამ დევიძე

დასწრებისთვის, გთხოვთ შეავსოთ სააპლიკაციო ფორმა 25 სექტემბრის ჩათვლით.

ინფორმაციას პრეზენტაციის ადგილმდებარეობის შესახებ მიიღებთ რეგისტრაციის შემდგომ, ელექტრონული ფოსტის მეშვეობით.

კლიმატის ჩარჩო-კონვენციასთან საქართველოს მე-4 ეროვნული შეტყობინების დოკუმენტის მიხედვით, საქართველოში დასახლებული პუნქტების 60% სხვადასხვა ტიპის კლიმატის ცვლილების შედეგად დაჩქარებული სტიქიებისა და კატასტროფების რისკების წინაშე დგას, რაც განსაკუთრებით თვალსაჩინო გახდა გასულ წელს, რისი მაგალითიცაა 2023 წელს მომხდარი კატასტროფები რაჭაში, გურიაში, აჭარასა დაიმერეთში. კატასტროფების რისკებისა და მიყენებული ზიანის შემცირება სისტემურ მიდგომას და ამ პროცესების ადეკვატურ მართვას საჭიროებს. თუმცა, დღეს სახელმწიფოს პოლიტიკა კლიმატის ცვლილებით გამოწვეული კატასტროფების მართვასთან დაკავშირებით ბუნდოვანი და არაეფექტურია. არსებული მართვის მექანიზმები კი, სრულიად დაცლილია გენდერული ასპექტებისგან.

ორგანიზაციამ “ქალები საერთო მომავლისთვის (WECF) - საქართველო“ ეკომიგრაციის საკითხებზე მუშაობა გასული წლის ოქტომბერში დაიწყო. ეკომიგრაცია სახელმწიფოს მხრიდან მხოლოდ სოციალური პრობლემად არის აღქმული, რაც აფერხებს ეკომიგრანტებისთვის ადეკვატური მხარდაჭერის მიღებას, რომელსაც არ ექნება მხოლოდ ერთჯერადი ხასიათი. ამ და სხვა საკითხებზე WECF საქართველომ, კლიმატისა და გარემოსდაცვითი საკითხების მკვლევართან მარიამ დევიძესთან თანამშრომლობით, ჩაატარა კვლევა, და მოხარულები ვართ მოგიწვიოთ კვლევის პრეზენტაციაზე.

გარდა ამისა, WECF საქართველო მიზნად დაისახა პირველი ეკოფემინისტური სამუშაო ჯგუფის შექმნა, რომლის ფარგლებშიც გაერთიანდებიან კლიმატის ცვლილებასა და გარემოსდაცვით, გენდერისა და ქალთა საკითხებზე მომუშავე ორგანიზაციები და ერთობლივად იმუშავებენ ეკომიგრაციის მართვის საკითხებზე. გვსურს, ოფიციალურად წარვადგინოთ სამუშაო ჯგუფის კონცეფცია და მიზნები, და ჯგუფში გაწევრიანების შესაძლებლობა მივცეთ ორგანიზაციებსა და აქტივისტებს.

Time: October 2, 14:30 Location: Radisson Blu Iveria

“Women Engage for a Common Future (WECF) - Georgia" invites you to the presentation of the research study titled "Climate Change Disasters and Women: Systemic Problems of Eco-migration Prevention and Management." We will also officially introduce the first eco-feminist taskforce.

The research will be introduced by Mariam Devidze, the researcher.

To participate, please fill out the application form by September 25th.

You will receive information about the presentation venue after registration via email. English translation is provided.

According to Fourth National Communication of Georgia to the UNFCCC 60% of settlements face the risk of accelerated natural disasters due to climate change. This was particularly evident last year, with disasters occurring in Racha, Guria, Adjara, and Imereti. A landslide in Shovi, Racha claimed the lives of 32 people, and a month later, another landslide in Guria resulted in three fatalities. Additionally, on February 6 and 7, 2024, landslides and avalanches in Adjara and Imereti caused 11 more deaths. Hundreds of families in Guria also require resettlement. To effectively reduce disaster risks and damages, a systematic approach and proper management of these processes are essential. However, current state policies regarding climate change disaster management are vague and ineffective, lacking any gender responsive considerations.

WECF Georgia began addressing eco-migration issues in October of last year. The state views eco-migration solely as a social problem, which hinders eco-migrants from receiving the ongoing support they need. In collaboration with Mariam Devidze, environmental and climate change expert, WECF Georgia conducted a study on these topics. We are pleased to invite you to the presentation of the research findings.

Furthermore, WECF Georgia aims to establish the first eco-feminist task force, bringing together organizations focused on climate change, environmental issues, gender, and women's rights to collaboratively address eco-migration management. We will formally present the group's concept and goals and offer opportunities for organizations and activists to join this initiative.

by Anna Samwel

ინკლუზიური მომავალი: ქალების, ახალგაზრდების და უმცირესობების გაძლიერება ცვლილებებისთვის

პროექტის „ინკლუზიური მომავალი: ქალების, ახალგაზრდების და უმცირესობების გაძლიერება ცვლილებისთვის“, რომელსაც ორგანიზაცია “ქალები საერთო მომავლისათვის (WECF) – საქართველო”, ადგილობრივ აქტივისტებთან და სათემო ლიდერებთან ერთად ახორციელებს, მთავარი მიზანი ანტიგენდერული კამპანიის, დისკრიმინაციისა და მარგინალიზაციის წინააღმდეგ ბრძოლაა, რომელსაც საქართველოში ეთნიკური და რელიგიური უმცირესობების ქალები, ახალგაზრდები და სხვა ჩაგრული ჯგუფები აწყდებიან.

პროექტი ხორციელდება სამცხე-ჯავახეთისა და კახეთის რეგიონებში და მის მთავარ ფოკუსს ქალთა პოლიტიკური მონაწილეობა, აქტიური მოქალაქეობა და დემოკრატიულ პროცესებში ეთნიკური და რელიგიური უმცირესობების ჩართულობის ზრდა წარმოადგენს.

ამის გათვალისწინებით, პროექტის ერთ-ერთი მთავარი ამოცანაა, ერთი მხრივ, ქალთა პოლიტიკურ მონაწილეობასა და გენდერულ თანასწორობაზე შესაბამისი ცოდნის გავრცელება, ხოლო, მეორე მხრივ, სამიზე რეგიონებში მცხოვრები ქალებისა და ახალგაზრდების უნიკალური საჭიროებების იდენტიფიცირება და მათი პოლიტიკურ დღის წესრიგში დაყენების აუცილებლობის ხაზგასმა. პროექტი განსაკუთრებულ მნიშვნელობს ანიჭებს ახალგაზდების ჩართულობას და მათზე მორგებული ცნობიერების ამაღლების ინკლუზიური კამპანიის წარმოებას.

გარდა ამისა, პროექტი მოიაზრებს რეგიონულ მედიასთან მუშაობასაც, რათა ერთი მხრივ, ეთიკურად და აქტუალურად გაშუქდეს ზემოაღნიშნული საჭიროებები, ხოლო მეორე მხრივ, რეგიონში მომუშავე ჟურნალისტებს, თავიანთი საქმიანობის პროცესში, ჰქონდეთ შესაბამისი მხარდაჭერა, რაც გულისხმობს გენდერულ დეზინფორმაციასთან ბრძოლის რეგიონალური კონტექსტის გაცნობას, კიბერ უსაფრთხოების მიმართულებით გაძლიერებას თუ მენტალური და ფიზიკური ჯანმრთელობაზე ზრუნვის მნიშვნელობას პროფესიული საქმიანობის განხორციელებისას.

პროექტი „ინკლუზიური მომავალი: ქალების, ახალგაზრდების და უმცირესობების გაძლიერება ცვლილებისთვის“ ხორციელდება ,,ქალები საერთო მომავლისთვის (WECF) - საქართველოს” მიერ, USAID-ის პროგრამა „ერთიანობა მრავალფეროვნებაშია“ ფარგლებში, რომელსაც ახორციელებს საქართველოს გაეროს ასოციაცია, აშშ-ის საერთაშორისო განვითარების სააგენტოს ფინანსური მხარდაჭერით.

by Anna Samwel

ონლაინ ტრეინინგი ClimaFemx გენდერისა და კლიმატის ურთიერთმიმართების შესახებ

ჩვენი ორგანიზაციის საერთაშორისო და გერმანიის ოფისები, Ifa - Institut für Auslandsbeziehungen-თან და Beeco-სთან ერთად გიწვევთ ტრეინინგზე ClimaFemx, რომელიც გენდერისა და კლიმატის ურთიერთმიმართებას შეეხება.

თუ ხართ ქალი ან გენდერულად არაკონფორმული ახალგაზრდა და გსურთ მეტი გაიგოთ კავშირზე გენდერსა და კლიმატს შორის, გამოაგზავნე განაცხადი ჩვენს ClimaFemx პროგრამაზე!

ტრეინინგი განკუთვნილია საქართველოში, აზერბაიჯანსა თუ გერმანიაში მცხოვრები ახალგაზრდებისთვის და გაგრძელდება მთელი სექტემბრის განმავლობაში (თარიღები დაზუსტდება). ტრეინინგების სერიას უძღვებიან ჩვენი ორგანიზაციის საერთაშორისო ოფისის თანამშრომლები და შესაბამისად, გთხოვთ, გაითვალისწინოთ, რომ ღონისძიება სრულად ტარდება ინგლისურ ენაზე.

კურსის დასასრულს, მონაწილეები მიიღებენ სერტიფიკატს.

გაიგეთ მეტი და გამოაგზავნეთ განაცხადი: https://shorturl.at/czXUG

განაცხადის გამოგზავნის ბოლო ვადაა: 31 ივლისი

by Anna Samwel

პროექტი "ინკლუზიური მომავალი: ქალების, ახალგაზრდების და უმცირესობების გაძლიერება ცვლილებებისთვის"

პროექტის „ინკლუზიური მომავალი: ქალების, ახალგაზრდების და უმცირესობების გაძლიერება ცვლილებისთვის“, რომელსაც ორგანიზაცია “ქალები საერთო მომავლისათვის (WECF) - საქართველო”, ადგილობრივ აქტივისტებთან და სათემო ლიდერებთან ერთად ახორციელებს, მთავარი მიზანი ანტიგენდერული კამპანიის, დისკრიმინაციისა და მარგინალიზაციის წინააღმდეგ ბრძოლაა, რომელსაც საქართველოში ეთნიკური და რელიგიური უმცირესობების ქალები, ახალგაზრდები და სხვა ჩაგრული ჯგუფები აწყდებიან.

პროექტი ხორციელდება USAID-ის „ერთიანობა მრავალფეროვნებაშია“ პროგრამის დახმარებით, რომელსაც ახორციელებს საქართველოს გაეროს ასოციაცია, აშშ-ის საერთაშორისო განვითარების სააგენტოს ფინანსური მხარდაჭერით.

by Anna Samwel

ეკოფემინისტური ფესტივალი – ეკოფემინისტური მოძრაობის მშენებლობის 30 წელი

დაარსების (1994 წ.) დღიდან, ორგანიზაცია “ქალები საერთო მომავლისთვის (WECF)” მუშაობს თავის გლობალურ პარტნიორებთან ერთად და მათ მხარდამხარ, ეკოფემინისტური მოძრაობის გაძლიერებაზე. ამის აღსანიშნავად ჩვენი ორგანიზაციის ყველა ოფისის წარმომადგენლებმა 22 ივნისს ამსტერდამში ეკოფემინისტურ ფესტივალს უმასპინძლეს, რომლის მიზანიც იყო წარმოგვეჩინა ეკოფემინიზმი და მისი მრავალგვარი გამოხატულებები! ეკოფემინისტური ფესტივალი დაეთმო ინტერაქციულ სესიებს, კრეატიულ სემინარებს, სპეციალურ სტუმრებთა მოხსენებებს, საინტერესო გამოფენებს, ცოცხალ მუსიკასა და საინტერესო გამოფენა-გაყიდვებს. Მსგავსი შეკრება ზუსტად ასახავდა იმ სულისკვეთებას, რომელსაც WECF თავის თავში მოიცავს. ღონისძიებებს ესწრებოდნენ წარმომადგენლები WECF-ის ყველა ოფისიდან და ყველა აქტივობა ეხებოდა ისეთ საკვანძო საკითხებს, როგორებიცაა: მდგრადი განვითარება, კლიმატის ცვლილება და ტოქსიური ნივთიერებებისგან თავისუფალი მომავალი.

“დღევანდელი დღეს არსებული კონფლიქტების ფონზე, ფემინისტური სოლიდარობა იმაზე მნიშვნელოვანია ვიდრე ოდესმე, რათა ვიპოვოთ მშვიდობა სამყაროში, რომელიც ისწრაფვის კავშირების დამყარებისკენ, თუმცა ამის მიუხედავად, ფრაგმენტული და დაყოფილია.” მოდერატორმა ნაომი ანტონიუსმა ყურადღება გაამახვილა გაერთიანების აუცილებლობაზე, რომელიც დღეს ისეთი მნიშვნელოვანია როგორც არასდროს. ასევე, სხვადასხვა სესიების დროს, ხაზი გაესვა ჰოლისტიკური მიდგომის აუცილებლობის მნიშვნელობას დღევანდელ მრავალმხრივ კრიზისულ რეალობაში, თავის მხრივ, ამაზე ასევე ისაუბრა მთავარმა მომხსენებელმა, ჯესიკა დენ აუტერმაც თავის შესავალ სიტყვაში. ჯესიკა 2017 წლიდან არის ჩართული International Rights for Nature მოძრაობაში, არის წიგნის „უფლებები ბუნებისთვის“ ავტორი და ამჟამად არის Rights of Nature Foundation-ის დირექტორი ნიდერლანდებში.

მოდერატორი ნაომი ანტონიუსი და ტრუპი ჯაინი მთავარი მომხსენებელი ჯესიკა დენ აუტერი

Შთამაგონებელი სიტყვების შემდეგ, სესია დაასრულა ნაომიმ, რომელსაც დამსწრე ფემინისტებს, კლიმატის აქტივისტების გარემოსდამცველებსა და ახალგაზრდა აქტიურ მოქალაქეებს მოუწოდა მეტი გაეგოთ ეკოფემინიზმის შესახებ და ეფიქრათ შემდეგ კითხვაზე:

რა სურთ და რა სჭირდებათ ეკოფემინისტებს?

ქალთა გარემოსდაცვითი პროგრამის (WEP) აღმასრულებელ დირექტორს, ენ-მარი აბაგუს, ღონისძიების მსვლელობისას თავისი ენერგიულობის დამსახურებით, „პეპელას“ სტატუსი მიანიჭეს, ვინაიდან ის სხვადასხვა სესიებს შორის “დაფრინავდა” და მისთვის მნიშვნელოვან და განსაკუთრებით საინტერესო თემებს ასახავდა.

გაეცანით WECF-ის ეკოფემინისტურ აქტივობებს

სესიებს შორის ეკოფემინისტური ფესტივალი სავსე იყო სტუმრებით, რომლებიც ტკბებოდნენ ლათინური მუსიკითა და გემრიელი ვეგანური საჭმლით. ბაზრობაზე წარმოდგენილი იყო ფემინისტური ბიბლიოთეკა ჯესიკა დენ აუტერისა და რალიენ ბეკერსის წიგნებით, სახალისო ფოტო-ჯიხური და ანაბელ ავრილის ფოტოგამოფენა. WECF საფრანგეთის ოფისმა მოაწყო "ეკოფემინისტური ტრივია", რომელის ნაწილიც იყო უზარმაზარი კამათელი და ქილის სროლის თამაში. გერმანიის ოფისის გუნდმა კი, მონაწილეები მიიწვია თამაშის „Watt a Bingo! Გაიღმავე შენი ცოდნა გენდერულ და ენერგეტიკულ სიღარიბეზე“ სათამაშოდ. WECF-ის ნიდერლანდების გუნდმა წარმოდგინა ე.წ. “ბედის ბორბალი”, რითაც შეისწავლა ხალხის ცოდნა ევროპაში არჩევნების შესახებ. და ბოლოს, საქართველოს ოფისმა ღონისძიების ადგილას ჩაწერა პოდკასტის "ჩემი ხმა ისმის?" ეპიზოდი.

ინფორმაციული სესიები

ღონისძიების დღის პირველი სესია დაეთმო თემას შემდეგი სახელწოდებით: „ჩემი ხმა იმის?: დემოკრატია ზეწოლის ქვეშ“. Სესიის ფარგლებში ვისაუბრეთ სხვადასხვა საფრთხეებზე, რომლებსაც სამოქალაქო საზოგადოება, ფემინისტური ორგანიზაციები, ადამიანის უფლებათა, გარემოსდაცვითი აქტივისტები და მარგინალიზებული ადამიანები აწყდებიან და განვიხილეთ, თუ რა შეგვიძლია გავაკეთოთ წინააღმდეგობის გასაწევად და ეკოფემინისტური მოძრაობის მობილიზებისთვის. Ანა მურადაშვილმა, გენდერის მკვლევარმა და უფლებადამცველმა საქართველოდან, ენ-ფლორ დეკერმა, ჰოლანდიური გენდერული პლატფორმის WO=MEN-ის აღმასრულებელმა დირექტორმა და დანიელ ჰირშიმ, ნიდერლანდების პარლამენტის წევრმა და GroenLinks/PvdA-სა და Both Ends-ის ყოფილმა დირექტორმა, ამ ძალიან დროულ დისკუსიაში განიხილეს რეგრესული ტენდენციები საქართველოში, ნიდერლანდებში, ევროკავშირში და გლობალურად. პანელისტებმა ისაუბრეს წინააღმდეგობის მნიშვნელობაზე იმ ანტიგენდერული კამპანიებასთან მიმართებით, რომლებსაც ულტრამემარჯვენე პარტიები, მათ შორის ნიდერლანდებში, და აღნიშნეს ფემინისტური სოლიდარობისა და ფართო ალიანსების შექმნის საჭიროებასა და მნიშვნელობაზე.

ნიდერლანდების პარლამენტის დეპუტატი დანიელ ჰირში პანელზე საუბრისას

მეორე საინფორმაციო სესიაზე სახელწოდებით „კლიმატის მოძრაობის მომავალი“, დისკუსიის მთავარი საკითხი იყო გენდერულად მგრძნობიარე კლიმატური გადაწყვეტილებები და რატომ არის აუცილებელი ამ გადაწყვეტილებებში ფემინისტური ჩართულობა? პანელზე ჩვენ ვესაუბრეთ სამ ქალს, რომელთაგანაც თითოეულმა განსხვავებული გზა აირჩია თავიანთ ბრძოლებში კლიმატის გენდერული სამართლიანობისთვის. Ერთ-ერთი მათგანი იყო რალიენ ბეკერსი ავტორი, რომელიც მოწინავეა ნიდერლანდების ფინანსთა სამინისტროში კლიმატის მიმართულებით, ასევე, აგნეს შიმ ვან დერ ლოეფი, კლიმატის მართლმსაჯულების პოლიტიკის მრჩეველი ActionAid ნიდერლანდებიდან და ტრუტი ჯაინი, რომელიც არის Naireeta Services-ის დამფუძნებელი დირექტორი ინდოეთში. ტრუტიმ ყველას, ისევე როგორც ფერმერ ქალებს ინდოეთში,მოუწოდა "არ დაელოდონ" და მიიღონ ზომები კლიმატის ცვლილების წინააღმდეგ.

და ბოლოს, სესიაზე "საიდუმლო ტოქსინები", საშა გაბიზონმა WECF International-ის აღმასრულებელმა დირექტორი და მარგრიტ მანტინგმა, ნიდერლანდების პესტიციდების სამოქმედო ქსელის თავმჯდომარემ, გამოიკვლიეს თუ რა ტოქსიკურ ნივთიერებებს ვპოულობთ უჩვეულო და არასასურველ ადგილებში. Ტოქსიკური ქიმიკატები ყველგან, სადაც არ უნდა გაიხედოთ: ჩვენს საკვებში, ყვავილების შეკვრაში, თქვენი შვილების სათამაშოებში და სხვა. Სესიიდან გავიგეთ, რომ ამ ტოქსიკურ ნივთიერებების ზემოქმედებამ შეიძლება გამოიწვიოს შეუქცევადი დაავადებები და ამ ტოქსიკური ნივთიერებებიდან ბევრი შედის „სამუდამო ქიმიკატების“ კლასში, რომლებიც თაობიდან თაობას გადაეცემა, გროვდება და ზრდის რისკს. ბოლოს, ჩვენ განვიხილეთ, თუ რა შეგვიძლია გავაკეთოთ იმისათ ამ ტოქსიკური ნივთიერებების ზემოქმედების თავიდან ასაცილებლად, მაგალითად, პლასტმასისგან თავის არიდებით და შესაძლებლობის ფარგლებში, ადგილობრივი ორგანული ფერმერის მხარდაჭერით.

"ეკოფემინისტებს სურთ..." ბანერზე მუშაობა

კრეატიული სემინარები

საინფორმაციო სესიებთან ერთად, გაიმართა რამდენიმე შემოქმედებითი სესია გაიმართა. სიეტა ვან ჰორკი ხელმძღვანელობდა შესანიშნავ სემინარს "შინაგანი აქტივიზმის" შესახებ, რომელიც განკუთვნილი იყო ყველასთვის, ვისაც სურს უფრო ინტენსიურად და ეფექტურად მიიღოს მონაწილეობა ჩვენი სამყაროს გადარჩენაში. მონაწილეებმა მოიპოვეს ემოციებთან გონივრული გამკლავებისთვის საჭირო პრაქტიკული ინსტრუმენტები, ისწავლეს საკუთარი უნიკალური ძალის ამოცნობა და გამოყენება და გამოიკვლიეს თუ როგორ გამოიყენონ საზოგადოების ძალა ეფექტური აქტივიზმისა და მდგრადი ცვლილებებისთვის. მეორე სესიაზე, WECF-ის კოლეგებმა მონაწილეები მოიწვიეს რეფლექსიისთვის და თავიანთი ხმის გასაჟღერებლად სადემონსტრაციო ბანერზე „ეკოფემინისტებს სურთ…“, რომელიც მთელი დღის განმავლობაში შეიქმნა. ბოლოს, ჯეიკე მეიჯერმა მოაწყო "ეკოფემინისტური სიმღერების წერის მასტერკლასი", რომელშიც ჩვენ გამოვიკვლიეთ, თუ როგორ შეიძლება შევავსოთ კრეტიული წერა და სიმღერების ტექსტი მხატვრული და აქტივისტური გზავნილებით, რაც პოლიტიკური სიმღერების ავტორებისგან და ბიონსესაც კი იყო! ჩვენს ეკოფემინისტურ ბაზრობაზე შთამაგონებელი პროგრამის შემდეგ, ჩვენ გავაგრძელეთ ზეიმი ჩვენს ახლო მეგობრებთან, პარტნიორებთან და მოკავშირეებთან ერთად მიღებაზე.

(პროფესიონალური ფოტოები: Josette Egema).

იხილეთ სტატია ინგლისურად.

by Anna Samwel

ბონის მოლაპარაკებები კლიმატის შესახებ: ძირითადი მოვლენები და უკმაყოფილებები COP29-ის წინ

2024 წლის ივნისში, სახელმწიფოების წარმომადგენლები გერმანიაში, ბონში კლიმატის შესახებ მოლაპარაკებებისთვის შეიკრიბნენ, რაც გაერთიანებული ერების (გაეროს) კლიმატის ცვლილების 29-ე კონფერენციის მოსამზადებელი ნაწილია. ორგანიზაცია ქალები საერთო მომავლისთვის (WECF) და სხვა პარტნიორები Women and Gender Constituency (WGC)-დან აქტიურად უჭერდნენ მხარს უფრო პროგრესული ენის გამოყენებას.

ბონში გადაწყვეტილების მიღების პროცესი ნელი ტემპით, საკვანძო საკითხების ზედაპირული განხილვით შემოიფარგლებოდა. ბოლო დროს არსებული ბრალდებები აზერბაიჯანის, COP29-ის მასპინძლის, მიმართ ხაზს უსვამს გამჭვირვალობისა და ინკლუზიურობის აუცილებლობას. სამოქალაქო საზოგადოებამ, მათ შორის WECF-მა, შეშფოთება გამოთქვა COP29-თან და მიმდინარე მოლაპარაკებებთან დაკავშირებით. აღსანიშნავია, რომ ჩვენ დაუყოვნებლივ გვჭირდება უფრო პროგრესული ვალდებულებები.

The Women & Gender Constituency ქვეყნებს მეტი ამბიციურობისკენ მოუწოდებს

SB60 პირველ დღეს, The Women & Gender Constituency-ის (WGC) სახელით მნიშვნელოვანი გამოსვლა ჰქონდა ვალერია პელაეს კარდონას. მან მოუწოდა მთავრობებს, დაიცვან კლიმატის დაფინანსების ამბიციური „ახალი კოლექტიური რაოდენობრივი მიზანი (NCQG)“. მან ხაზგასმით აღნიშნა გაზრდილი, წინასწარ გათვლილი დაფინანსების აუცილებლობაც, რომელიც ორიენტირებული იქნება ადამიანის უფლებებსა და გენდერულად ტრანსფორმაციული კლიმატის ქმედებებზე, რაც აუცილებელია სამართლიანი ტრანსფორმაციისთვის, რომელიც დაფუძნებულია ზრუნვის, რასობრივი და თაობათაშორისი სამართლიანობის პრინციპებზე, იხილეთ ვიდეო.

ვალერია პელაეს კარდონა სიტყვით გამოსვლის დროს.

წიაღისეული საწვავის შესახებ მყარი პოზიციის ქონის საჭიროება

დისკუსიები გლობალური საფონდო შეთანხმების (GST) შესახებ უნდა მოიცავდეს შესაბამის ენობრივ მოცემულობებს წიაღისეული საწვავის ეტაპობრივი გამორიცხვის, განახლებადი ენერგიის გასამმაგებისა და ენერგოეფექტურობის გაორმაგების შესახებ. თუმცა, განხილვები ყოველწლიური შეფასების კრიტერიუმებს უგულვებელჰყოფდა, გვერდს უვლიდა და არ იძლეოდა საშუალებას დისკუსიები სამართლიანი გადანაწილების და ადგილობრივი თემების, ქალების, გენდერულად არაკონფორმულიინდივიდებისა და მკვიდრი (ადგილობრივი) ხალხის ჩართულობით წარმართულიყო.

ფემინიზმი საჭიროა სამართლიანი ტრანზიციისთვის

WGC იმედგაცრუებულია SB60 მოლაპარაკებებით „სამართლიანი გარდაქმნის სამუშაო პროგრამის“ შესახებ. სამუშაო ვერსიის განხილვის გადადება COP29-სთვის, ბაქოში, ფეხქვეშ თელავს პროგრესს COP28-დან. ამჟამინდელ სამუშაო მონახაზს აკლია ზუსტი ვადები, გამჭვირვალობა და ანგარიშვალდებულება. ეს ნაბიჯი კრიტიკული კლიმატის სამართიანობის ინიციატივების წინსვლის ნაცვლად, უკან დახევის შემაშფოთებელ ტენდენციას ასახავს. ის ასევე უგულებელყოფს საერთაშორისო თანამშრომლობას. გენდერულად ტრანსფორმაციული მიდგომა არსებითად მნიშვნელოვანია, რადგან ის მოიცავს შინ და ზრუნვის შრომას და აცნობიერებს ქალთა და გენდერულად არაკონფორმული ადამიანების წვლილს.

კლიმატის უკეთესი დაფინანსების მოთხოვნა

კლიმატის დაფინანსება მილიარდებიდან უნდა გაიზარდოს ტრილიონამდე, იმისთვის რომ შესაბამისი სამუშაოები გატარდეს მიტიგაციის (მზადყოფნის ამაღლების და მოწყვლადობის შემცირების), ადაპტაციისა და ზარალისა და ზიანის შემცირებისთვის გლობალური ჩრდილოეთიდან გლობალურ სამხრეთამდე. ჩვენ გვესაჭიროება პირდაპირი, სამართლიანი და გენდერულად მგრძნობიარე დაფინანსება, მაგრამ ქვეყნები თავს არიდებდნენ სახელმწიფო დაფინანსების ან გრანტების ვალდებულებას. დისკუსიები ასევე შეეხო ტექნოლოგიური და ფინანსური მექანიზმის დაკავშირებას. ჩვენ მხარს ვუჭერდით გენდერული და მკვიდრი მოსახლეობების ცოდნის კლიმატის პოლიტიკებში დანერგვას, რათა უზრყნველყოფილი იყოს წინა ხაზზე მყოფი თემების ჩართულობა და შესაძლებლობა, განავითარონ კლიმატის შესახებ არსებული გადაწყვეტილებები.

მოლაპარაკებები გენდერის შესახებ შემაწუხებლად ნელია

გენდერის შესახებ მოლაპარაკებების დაწყებამდე, ჩართული მხარეები დავესწრით 3 დღიან ვოქრშოფს, რათა განგვეხილა გენდერული სამოქმედო გეგმის (GAP) პროგრესი და სამომავლო გეგმები. ამის მიუხედავად, ლიმას განახლებულ სამუშაო პროგრამაზე (LWP) მოლაპარაკებები გენდერულ საკითხებზე სწრაფად ჩაიკარგა პროცედურულ და ტექნიკურ საკითხებში. Women and Gender Constituency-მა გამოაქვეყნა განცხადება, რომელშიც მხარეებს მოუწოდებდა ეფექტურად ემოქმედათ SB60-ის ბოლო დღეებში. რებეკა ჰეუველმანსმა ხაზგასმით აღნიშნა: „გამოიყენეთ შესაძლებლობა დადგეთ მათ გვერდით, ვინც კლიმატის კრიზისის მძიმე ტვირთს ატარებს, ერთობლივად მუშაობით ძლიერი LWP-ისა და GAP-ისკენ“. მოლაპარაკებები COP29-ზე ბაქოში გაგრძელდება, სადაც ბევრი სამუშაო იქნება საჭირო ძლიერი და ამბიციური LWP-ისა და GAP-ის უზრუნველსაყოფად. Women and Gender Constituency-ის ძირითადი მოსაზრებებისა და მოთხოვნების, ახალი LWP-ისა და GAP-ის შესახებ გასაგებად, გაეცანით ოფიციალურ განცხადებას.

შეხვედრა აზერბაიჯანის ახალ, უმაღლესი დონის ჩემპიონთან

WGC შეხვდა უმაღლესი დონის კლიმატის ჩემპიონებს არაბთა გაერთიანებული საამიროებიდან და აზერბაიჯანიდან. WECF-ის დირექტორმა საშა გაბიზონმა ხაზი გაუსვა WECF-ის ტრენინგს გენდერისა და კლიმატის შესახებ კავკასიაში და გენდერის საკითხისადმი პრიორიტეტის მინიჭების მნიშვნელობაზე ყველა სახის მოლაპარაკებებში. მიში სინგანომ, WGC-ის წამყვანმა პოლიტიკის კოორდინატორმა, მოუწოდა COP29-ს, ფოკუსირდეს არა მხოლოდ ფინანსებზე, არამედ გენდერზეც და ხაზი გაუსვა გენდერული თანასწორობის უმაღლეს დონეზე არსებობას, როგორც მთავარ პრიორიტეტს.

კონკრეტული ღონისძიებები ფემინისტური და ადამიანის უფლებების პრიორიტეტებისთვის

ჩვენ ვისაუბრეთ გენდერულ და კლიმატურ სამართლიანობაზე არა მხოლოდ მოლაპარაკებების ოთახებში, არამედ საკონფერენციო სივრცის მიღმაც და Women and Gender Constituency-თან და სხვა მხარეებთან ერთად სხვადასხვა აქტივოებებში ჩავერთეთ.

უთხარით არა გამანადგურებელ გადაწყვეტილებებს

გარემოსდაცვითი სამოქმედო ჯგუფებთან, ადგილობრივ ხალხებთან და ახალგაზრდებთან ერთად, ხაზი გავუსვით იმ „ყალბ გადაწყვეტილებებს“, რომლებიც კლიმატის მოლაპარაკებებში კორპორაციული ინტერესებს უწყობენ ხელს. საშიშ ტენდენციას წარმოადგენს სამრეწველო ბიომასის პლანტაციები, რომლებიც ართმევენ მიწებს ადგილობრივ მოსახლეობას და ზიანს აყენებენ ბიომრავალფეროვნებას. ჩვენ ასევე ვისაუბრეთ ბირთვული ენერგიის გარშემო არსებულ მითებზე, მის არაეკოლოგიურ ბუნებასა და უსამართლო ბუნებაზე. ურანის მოპოვება, უპირველეს ყოვლისა, ადგილობრივი მოსახლეობის მიწებზე, ზიანს აყენებს ადგილობრივი თემების ჯანმრთელობას, წყალს და გარემოს. ბირთვული ენერგია ძალიან გაწელილი, ძვირი და სარისკოა. განახლებად ენერგიაში ჩადებული იგივე ინვესტიციები საშუალებას მოგვცემდა დაუყოვნებელ, იაფ გადაწყვეტილებებს რადიოაქტიური დაბინძურების საფრთხის გარეშე. ჩვენ მხარს ვუჭერთ რეალურ გადაწყვეტილების მექანიზმებს, და "რეალური ნულის" პოლიტიკას, ნაცვლად "სრული ნულისა".

ღონისძიება ბირთვულ ენერგიის წინააღმდეგ ბონის საკონფერენციო ცენტრში

შეწყვიტეთ გენოციდის დაფინანსება

აქტივისტებმა, ახალგაზრდებმა, ორგანიზაციებმა და გაერთიანებებმა გაეროს მოლაპარაკებების წინ გამართეს საპროტესტო აქცია "შეწყვიტეთ გენოციდის დაფინანსება - არა დიდი დამაბინძურებლებს". წიაღისეული საწვავი აძლიერებს არა მხოლოდ კლიმატის კრიზისს, არამედ მილიტარიზმსა და ძალადობას. ჩვენ სოლიდარობა გამოვხატეთ პალესტინის, კონგოს და სუდანის მიმართ და ხაზი გავუსვით წიაღისეულ საწვავსა და კონფლიქტს შორის არსებულ კავშირს. გადახედეთ მშვიდობისა და დემილიტარიზაციის სამუშაო ჯგუფის ახალ გამოცემას, WGC-ის ორგანიზებით.

კლიმატის სამართლიანობა შეუძლებელია ადამიანის უფლებების გარეშე

სამოქალაქო საზოგადოების, ეკოფემინისტი აქტივისტების და უფლებადამცველთა მხარდამჭერი აქცია-პერფორმანსი გაიმართა ბონში, რაც პასუხია მათდამი გამოყენებულ ხელისშემშლელ და სადამსჯელო ქმედებებზე. დაპატიმრებული აქტივისტების გამოსვლები ხაზს უსვამს მათი გათავისუფლების (#FreeThemAll) აუცილებლობას. სამოქალაქო საზოგადოების ორგანიზაციები (CSO-ები) გადამწყვეტ როლს ასრულებენ კლიმატის და გენდერული პოლიტიკის ეფექტიანად განხორციელების უზრუნველსაყოფად. თუმცა, ამ ორგანიზაციებზე განხორციელებული წნეხი ძირს უთხრის ამ ძალისხმევას. კავკასიაში და მის ფარგლებს გარეთ, სამოქალაქო საზოგადოების ორგანიზაციები სამთავრობო პოლიტიკით გამოწვეულ დანაკლისს ავსებენ და შესაბამის სერვისებს სთავაზობენ მათ, ვინც ყველაზე მეტად ზარალდება კლიმატის ცვლილების, გენდერული უთანასწორობის თუ სხვა ჩაგვრების გამო. სამოქალაქო საზოგადოების ორგანიზაციების მუშაობა სასიცოცხლოდ მნიშვნელოვანია კლიმატის და გენდერული სამართლიანობის მისაღწევად.

ღონისძიება ადამიანებთა უფლებების შესახებ

იხილეთ სტატია ინგლისურად.

by Anna Samwel

მიიღეთ მონაწილეობა კონკურსში გენდერულად სამართლიანი ეკოლოგიური ინიციატივებისთვის!

ორგანიზაცია “ქალები საერთო მომავლისთვის” საერთაშორისო ოფისი Women and Gender Constituency (WGC)-სთან ერთად, აცხადებს აპლიკაციების მიღებას გენდერულად სამართლიანი ეკოლოგიური ინიციატივებისთვის ყოველწლიური პრიზის მოსაპოვებლად!

(აპლიკაციის შევსება შეგიძლიათ ფრანგულ, ინგლისურ, ესპანურ ან არაბულ ენებზე, აღნისნული გვერდის ბოლოში მოცემულ ბმულზე)

პრიზი გენდერულად სამართლიანი ეკოლოგიური ინიციატივებისთვის ყოველწლიურად ენიჭება მოძრაობებს, სათემო ჯგუფებს და არასამთავრობო ორგანიზაციებს, რომლებიც მუშაობენ გარემოსდაცვით საკითხებზე და ამავდროულად, ხელს უწყობენ მიდგომების ინტეგრირებას კლიმატის ცვლილებებთან ბრძოლის პროცესში. მსგავსი ინიციატივები გავლენას ახდენენ საზოგადოებივ აზრზე და გარემოსდაცვით სფეროში სისტემურ მიდგომებზე, რასაც შედეგად მოაქვს სოციალური და გარემოს გაუმჯობესება. ამგვარი ინიციატივების წახალისება ხელს უწყობს 2030 წლამდე გლობალური დათბობის 1,5 გრადუსიანი ნიშნულის მიზანს, რომელიც გაეროს მიერ არის განსაზღვრული.

გამარჯვებული ინიციატივები წარმოდგენილია სამი სხვადასხვა პროექტის კატეგორიაში:

ტექნიკური – გენდერული პასუხისმგებლობის მქონე გარემოსდაცვითი ინიციატივები, რომლებიც ორიენტირებულია ტექნოლოგიებზე, მაგალითად, წყალზე, რეგენერაციაზე, საკვების წარმოებაზე ან ტრანსფორმაციაზე, ციფრულ ტრანსფორმაციაზე, ნარჩენების შემცირებაზე და ა.შ.
არატექნიკური - გენდერული პასუხისმგებლობის მქონე გარემოსდაცვითი ინიციატივები, რომლებიც ორიენტირებულია ქცევის ცვლილებაზე, ურთიერთგანათლებაზე, უნარების გაზიარებაზე, შესაძლებლობების გაძლიერებაზე და ა.შ.
ტრანსფორმაციული – გენდერული პასუხისმგებლობის მქონე გარემოსდაცვითი ინიციატივები, რომლებიც ორიენტირებულია მმართველობის, ინსტიტუციური/საზოგადოებრივი ცვლილებებზე და ა.შ.

თითოეული გამარჯვებული მიიღებს ფულად ჯილდოს 5,000 ევროს ოდენობით და შესაძლებლობას დაესწროს გაეროს კლიმატის ცვლილების კონფერენციას (COP29), რომელიც ჩატარდება ბაქოში, აზერბაიჯანში. პრიზი სრულად დაფარავს მოგზაურობას და ასევე, გამარჯვებული ჩაერთვება WECF-ის გრძელვადიან სწავლების პროგრამაში, რომელიც მხარს უჭერს წამყვან ინიციატივებს გაძლიერებასა და ზრდაში. 20-მდე ნომინანტის პროექტი წარმოდგენილი იქნება პრიზის პუბლიკაციაში, ჩვენს ონლაინ პლატფორმებზე და დაჯილდოების ცერემონიაზე COP-ზე. ჯილდოს მიზანია აჩვენოს და წაახალისოს ინიციატივები სამართლიანი, თანასწორუფლებიანი და ჯანსაღი გარემოსთვის.

თუ თქვენი სამუშაო უკავშირდება გარემოსდაცვით და გენდერულ სამართლიანობას, გამოაგზავნეთ აპლიკაცია!

ჩვენ მხარს ვუჭერთ სახალხო მოძრაობებს, ორგანიზაციებს ქალთა ხელმძღვანელობით და ლგბტქი+ ორგანიზაციებს გლობალური სამხრეთიდან და გლობალური აღმოსავლეთიდან კონკურსში მონაწილეობისთვის.

განაცხადის გაგზავნის ბოლო ვადაა 2024 წლის 21 ივლისი, 23:59 (CEST - ცენტრალური ევროპის დრო).

განაცხადის გამოგზავნა შეგიძლიათ შემდეგ ბმულზე.

გთხოვთ გაითვალისწინოთ, რომ მონაწილეობის მისაღებად უნდა შეავსოთ სააპლიკაციო ფორმა. განაცხადის პროცესთან დაკავშირებით არსებული კითხვების შემთხვევაში, გთხოვთ, დაგვიკავშირდეთ შემდეგ ელ. ფოსტაზე: valeria.pelaez@wecf.org

ასევე, ნებისმიერი კითხვისა თუ დახმარების შემთხვევაში (მათ შორის, ენის ბარიერთან დაკავშირებით), გთხოვთ, დაგვიკავშირდეთ: georgia@wecf.org

კონკურსი ტარდება CTCN-თან პარტნიორობით და მხარს უჭერს:

by Anna Samwel

WECF საქართველოს განცხადება მიმდინარე მოვლენებზე

*FOR ENGLISH SCROLL DOWN*

14 მაისს საქართველოს პარლამენტის უმრავლესობის წევრებმა ქართველი ხალხის ეროვნული ინტერესებისა და კონსტიტუციის საწინააღმდეგო რუსული კანონი მესამე მოსმენით მიიღეს, ხოლო 18 მაისს საქართველოს პრეზიდენტმა, სალომე ზურაბიშვილმა აღნიშნულ კანონს ვეტო დაადო.

სრულად ვიზიარებთ საქართველოს პრეზიდენტის პოზიციას, რომ ამ კანონის გაუმჯობესება შეუძლებელია და ევროკომისიის განცხადებას, რომლის თანახმად კანონი გაწვეულ უნდა იქნას. კანონი აღარ არის მხოლოდ სამართლებრივი ტექსტი, არამედ ჯერ კიდევ მის მიღებამდე გადაიქცა ხელისუფლების ხალხზე ძალადობის, დაშინების ბერკეტად, რისი მოწმეებიც ვართ უკანასკნელი კვირების განმავლობაში.

სხვა არაერთ სამოქალაქო საზოგადოების ორგანიზაციასთან ერთად, კიდევ ერთხელ ვაფიქსირებთ ჩვენს პოზიციას, რომლითაც უარს ვამბობთ ხელისუფლების წარმომადგენლებთან ერთად შეხვედრებში მონაწილეობაზე; სამუშაო ჯგუფებსა და მრჩეველთა საბჭოებში მუშაობაზე და საერთაშორისო თუ სხვა სამუშაო ფორმატებში ხელისუფლებასთან კოორდინაციაზე, სანამ აღნიშნული არაკონსტიტუციური კანონი არ იქნება გაწვეული. ასევე, უარს ვაცხადებთ დავრეგისტრირდეთ ღირსების შემლახავ რეესტრში, რომელსაც აღნიშნული კანონი ითვალისწინებს.

ბოლო კვირების განმავლობაში ევროკავშირის არაერთმა ლიდერმა ღიად ისაუბრა რუსული კანონის შეუსაბამობაზე ევროპულ ღირებულებებთან და საქართველოს ევროინტეგრაციის გეზთან. მოვუწოდებთ საქართველოს მთავრობას არ წავიდეს ქართველი ხალხის ნების წინააღმდეგ და არ დაძლიოს პრეზიდენტის ვეტო, რაც იქნება ერთადერთი სწორი გადაწყვეტილება ქვეყნის სტაბილურობისა და მისი ევროპული მომავლისთვის.

On May 14, the majority of the Parliament of Georgia adopted a Russian law that contradicts the national interests and the constitution of Georgia with the third reading. On May 18, the President of Georgia, Salome Zurabishvili, vetoed this law.

We fully support the position of the President of Georgia that this law is beyond improvement and agree with the European Commission's statement that the law should be withdrawn. This law has ceased to be merely a legal text; even before its adoption, it became a tool for government violence and intimidation against the people, as we have witnessed in recent weeks.

Along with many other civil society organizations, we reiterate our stance: we refuse to participate in meetings with government representatives, work in working groups and advisory councils, or coordinate with the government in international or other formats until this unconstitutional law is repealed. Additionally, we refuse to register in the regrading registry mandated by this law.

In recent weeks, numerous EU leaders have openly criticized the law's incompatibility with European values and Georgia's path to European integration. We call on the Georgian government to respect the will of the Georgian people and uphold the president's veto. This is the only correct decision for the stability of the country and its European future.

by Anna Samwel